फुकुओका (जापान) — फुकुओका नेपाली फेस्टिवल २०२६ सफलतापूर्वक सम्पन्न भएको छ। क्यूशु क्षेत्रीय समितिको आयोजनामा सम्पन्न उक्त फेस्टिवलमा गैरआवासीय नेपाली समुदायको उल्लेखनीय सहभागिता रहेको थियो।
कार्यक्रममा गैरआवासीय नेपाली संघ (एनआरएनए) का उपाध्यक्ष समाजसेवि तथा व्यवसायी टंक गैरेले कार्यक्रममा उपस्थित हुँदै फेस्टिवलले विदेशमा रहेका नेपालीहरूको एकता, पहिचान र संस्कृतिको संरक्षणमा महत्वपूर्ण योगदान पुर्याएको बताए।
उनले यस्ता कार्यक्रमहरूले नेपाल र जापानबीचको सम्बन्धलाई थप मजबुत बनाउने उल्लेख गर्दै प्रवासी नेपालीहरूको सक्रियता प्रशंसनीय रहेको धारणा व्यक्त गरे।
फेस्टिवलमा नेपाली सांस्कृतिक प्रस्तुति, परम्परागत खानाका स्टल, तथा विविध मनोरञ्जनात्मक कार्यक्रमहरू आयोजना गरिएको थियो। जापानी समुदायको समेत उल्लेखनीय उपस्थिति र सहयोगले कार्यक्रमलाई अझ आकर्षक बनाएको आयोजकले जनाएको छ।
यस प्रकारका कार्यक्रमहरूले विदेशमा बसोबास गर्ने नेपालीहरूबीच आपसी सम्बन्ध सुदृढ गर्नुका साथै नेपालको कला, संस्कृति र पर्यटन प्रवर्द्धनमा टेवा पुर्याउने विश्वास गरिएको छ।
