काठमाडौं : नेपालमा हालै सम्पन्न निर्वाचन शान्तिपूर्ण रूपमा सम्पन्न हुनु लोकतन्त्रका लागि सकारात्मक संकेत मानिएको छ। निर्वाचनमार्फत देशले नयाँ नेतृत्व पाउने र अब विकास, स्थायित्व तथा जनअपेक्षालाई सम्बोधन गर्ने दिशामा सरकार अघि बढ्ने अपेक्षा गरिएको छ। राजनीतिक संक्रमण र अनिश्चितताको बीच पनि नेपाली जनताले लोकतान्त्रिक प्रक्रियामाथि देखाएको विश्वासले मुलुकलाई सही दिशातर्फ लैजाने आशा जगाएको छ।

देशले निर्वाचनमार्फत नयाँ निकास पाएको अनुभूति गरिरहँदा विदेशमा रहेका नेपालीहरूको साझा संस्था गैरआवासीय नेपाली संघ (एनआरएनए) को आगामी निर्वाचनप्रति पनि उत्तिकै चासो र अपेक्षा व्यक्त हुन थालेको छ। विश्वभर फैलिएका लाखौँ नेपालीहरूको प्रतिनिधित्व गर्ने यो संस्थाको नेतृत्व चयन पनि समयमै, निष्पक्ष र पारदर्शी रूपमा सम्पन्न हुनुपर्ने आवाज उठिरहेको छ।

एनआरएनए केवल संगठन मात्र नभई विदेशमा रहेका नेपालीहरूको भावना, अधिकार र पहिचानसँग जोडिएको साझा मञ्च हो। त्यसैले यसको निर्वाचन प्रक्रियाले पनि एकता, सहकार्य र लोकतान्त्रिक मूल्यलाई थप मजबुत बनाउने अपेक्षा गरिएको छ। लामो समयदेखि संस्थाभित्र देखिएका विवाद र मतभेदलाई समाधान गर्दै संगठनलाई अझ सुदृढ बनाउने अवसरका रूपमा आगामी निर्वाचनलाई हेरिएको छ।

यसै सन्दर्भमा विशेष गरी खाडी मुलुकहरूमा हाल देखिएका  अवरोध  पनि चाँडै समाधान होस । खाडी क्षेत्र नेपाली श्रमिकहरूको प्रमुख गन्तव्य भएकाले त्यहाँ रहेका सदस्यहरूको सहभागिता सुनिश्चित हुनु एनआरएनएको समग्र प्रतिनिधित्वका लागि अत्यन्त महत्वपूर्ण मानिन्छ। त्यसैले त्यहाँ देखिएका समस्या समाधान गर्दै सबैलाई सहभागी गराउने वातावरण निर्माण गर्नुपर्ने धारणा व्यक्त गरिएको छ।

यससँगै विदेशमा रहेका नेपालीहरूले नेपालमा गर्न चाहेको लगानीलाई प्रोत्साहन गर्ने वातावरण निर्माण गर्नु नयाँ सरकारको महत्वपूर्ण जिम्मेवारी मानिएको छ। गैरआवासीय नेपालीहरूले आर्जन गरेको सीप, अनुभव र पूँजीलाई नेपालभित्र भित्र्याउन सके देशको आर्थिक विकासमा महत्वपूर्ण योगदान पुग्ने विश्वास गरिएको छ। त्यसका लागि लगानीमैत्री नीति, स्पष्ट कानुनी व्यवस्था र प्रशासनिक झन्झट कम गर्ने कदम आवश्यक रहेको बताइन्छ।

त्यस्तै, गैरआवासीय नेपाली नागरिकताको विषय पनि अझै पूर्ण रूपमा कार्यान्वयन हुन नसकेको गुनासो विभिन्न क्षेत्रबाट आउने गरेको छ। कानुनी व्यवस्था भए पनि व्यवहारिक रूपमा अधिकार प्रयोग गर्न सकिने अवस्था नबनेको भन्दै यसलाई स्पष्ट र प्रभावकारी बनाउनेतर्फ सरकारको ध्यान जानुपर्ने अपेक्षा गरिएको छ।

विश्वभर रहेका गैरआवासीय नेपालीहरू एकताबद्ध भएर संस्थागत स्थायित्व र सकारात्मक परिवर्तनको दिशामा अघि बढ्नुपर्ने समय आएको विश्लेषकहरू बताउँछन्। समयमै निर्वाचन सम्पन्न भई सक्षम र समावेशी नेतृत्व चयन हुन सकेमा संस्थाप्रतिको विश्वास अझ बलियो हुने अपेक्षा गरिएको छ।

नेपालले जस्तै लोकतान्त्रिक प्रक्रियाबाट नयाँ आशा र निकास पाएको अनुभूति गैरआवासीय नेपाली संघले पनि पाओस् भन्ने चाहना धेरैको छ। पारदर्शी र सहमतिपूर्ण प्रक्रियाबाट नेतृत्व चयन भई संगठनले विश्वभर रहेका नेपालीहरूको हितमा अझ प्रभावकारी रूपमा काम गर्न सकोस् भन्ने अपेक्षा व्यक्त गरिएको छ।