चैत, काठमाडौं । नयाँ वर्ष २०८३ को अवसरमा पूर्वराजा ज्ञानेन्द्र शाह ले सबै राजनीतिक तथा सामाजिक पक्षलाई संवाद, सहमति र सहकार्यमार्फत संवैधानिक समाधान खोज्न आह्वान गरेका छन्।

सोमबार जारी शुभकामना सन्देशमा उनले निषेध, फुट, बन्द र विद्रोहजस्ता गतिविधिले राष्ट्रलाई कमजोर बनाउने बताउँदै यस्ता प्रवृत्तिहरूबाट टाढा रहन आग्रह गरेका छन्। “परस्परको राग, द्वेष, प्रतिशोध र निषेध राजनीतिमा हुन हुँदैन,” उनले उल्लेख गरेका छन्।

उनका अनुसार देशले विगतमा राजनीतिक र शासन प्रणालीमा धेरै परिवर्तन देखे पनि ती परिवर्तनहरू व्यवहारमा प्रभावकारी नभई “कोरा परिवर्तन” मात्रै बनेका छन्। राष्ट्र निर्माणमा अपेक्षित प्रगति हुन नसकेको भन्दै उनले नेपाल “प्रयोगशाला” जस्तो बनेको टिप्पणी गरेका छन्।

पूर्वराजा शाहले देश अहिले आर्थिक, सामाजिक तथा सुरक्षाका विभिन्न चुनौतीहरूबाट घेरिएको उल्लेख गर्दै आर्थिक अवस्था सुधार, आन्तरिक सुरक्षा सुदृढीकरण तथा अन्तर्राष्ट्रिय सम्बन्ध सन्तुलनमा ध्यान दिनुपर्ने आवश्यकता औंल्याएका छन्।

त्यसैगरी, युवाहरूको राजनीतिमा बढ्दो सहभागिता सकारात्मक भएको बताउँदै उनले शिक्षित, प्रविधिमैत्री र देश बुझेका युवाहरूको भूमिकाले राष्ट्र निर्माणमा टेवा पुग्ने विश्वास व्यक्त गरेका छन्।

सन्देशमा उनले नागरिकको जीवन सुरक्षित, भयमुक्त र आत्मनिर्भर बनाउने दिशामा राज्यले ठोस कदम चाल्नुपर्ने आवश्यकता औंल्याएका छन्। साथै, देशको मौलिक संस्कृति, परम्परा र स्रोत–साधनको संरक्षण र सदुपयोगमार्फत समृद्धि हासिल गर्नुपर्नेमा जोड दिएका छन्।

अन्त्यमा, उनले सबै नेपालीबीच एकता कायम गर्दै देशलाई शान्ति र उन्नतिको मार्गमा अघि बढाउन आग्रह गरेका छन्।

यस्तो छ नववर्षको पूर्वसन्ध्यामा पूर्वराजा ज्ञानेन्द्र शाहले गरेको सम्बोधन:

प्यारा नेपाली दाजुभाइ तथा दिदीबहिनीहरू

हामी नयाँ वर्ष २०८३ मा आइपुगेका छौं । नव वर्ष आरम्भको यो परिवर्तनको पुनित अवसरमा देशभित्र र संसारका विभिन्न भूभागमा रहे बसेका सबै नेपालीहरूलाई सुख र शान्तिको मंगलमग शुभकामना ।

समयको प्रवाहसँगै हामीले हाम्रो देश र समाजलाई प्रगतिपथमा अघि बढाउँदै जानुपर्दछ । विगतका कमी कमजोरी र त्रुटिलाई सच्याउँदै र वाधा व्यवधानलाई पन्छाउँदै हामी हाम्रो उच्चतम गन्तव्यतर्फ लम्किनुपर्छ । तब नै नयाँ वर्षको नवगत समयको अर्थ रहन्छ ।

वितेका कतिपय वर्ष वान्छित विकासका दृष्टिले नेपाल झन् झन् तल तल झर्दै गयो भन्ने नेपालीहरूको आम मनोभावना रह्यो । राजनीति, राज्य पद्धति र शासन प्रशासनको प्रणालीमा हामीले निकै हेरफेर हेर्‍यौं । तर त्यो कोरा परिवर्तनमात्रै भयो । दलदलको खलबलमा त हामी धेरै दगुरियौं । तर राष्ट्रको श्रीवृद्धिमा हामी निकै पछि पर्‍यौं । सधैं प्रयोग, सधैं अभ्यास र सधैं विकल्पको खोजीमा मात्रै लाग्यौं । फलस्वरुप हाम्रो देश प्रयोगशाला मात्रै रह्यो ।

स्थिरता, निरन्तरता, दृढता कता कता हराएर गयो । विधि, पद्धति, व्यक्ति बदलेर मात्रै समग्र स्थिति बन्ने रहेनछ भन्ने कुराको पाठ हामीलाई विगतले सिकाएको छ । राजनीति र राज्य सञ्चालनको गतिविधिमा युवा पिढीको संलग्नता बढ्दै जानु उत्साहको विषय हो । पढेलेखेका, देश बुझेका र आधुनिक प्रविधिको ज्ञान भएका उत्साही पात्रहरूको आगमनले राष्ट्रलाई फलदायी बनाउनुमा मद्दत पुग्छ भन्ने हामीलाई लागेको छ ।

आज हाम्रो देश चौतर्फी समस्याको चाङमा छ । यो बेलामा नेपाली जनताको आशा र अभिलाषा पनि उत्तिकै छन् । यो अवस्थामा हाम्रो आर्थिक अवस्थालाई कसरी उकास्ने, छिमेकीहरू र बाह्य मित्र शक्तिहरूको सहयोग, सद्भाव कसरी बढाउँदै जाने भन्नेमा हाम्रो ध्यान केन्द्रित हुनुपर्ने देखिन्छ । आन्तरिक सुरक्षा प्रणालीको दृष्टिले मुलुक अत्यन्तै नाजुक अवस्थामा परेको छ । नयाँ वर्षमा जीउधनको सुरक्षा, अत्यावश्यक वस्तु र स्रोत साधनको संरक्षण एवं जीवन जिउने मानवीय सुुरक्षाको हक अधिकारको प्रत्याभूति दिनु सुरक्षाका अंग, हाम्रा सेवा सुविधाका क्षेत्र, प्रकृति र मौसमी कारणमा हुने प्रकोपका विषयमा आन्तरिक सुरक्षालाई चुस्त बनाउन आवश्यक देखिन्छ । आजको विषम र अशान्त विश्वमा हामीले आफूलाई जोगाउने, उत्पादित वस्तुको जुगाड गर्ने र कुनै प्रकारको व्यवधान पर्न नदिनेतर्फ राज्यको गहिरो ध्यान पर्नुपर्ने देखिन्छ ।

आम नागरिकले कुनै प्रकारको शारिरिक, मानसिक, भौतिक तथा जीवन यापनको मामलामा त्रास,पीडा अभावको अनुभव गर्न नपरोस् । हरेक क्षेत्रमा भरपर्दो आत्मनिर्भर भएर परनिर्भरताबाट र स्वाधिन भएर पराधिनताबाट देशलाई जोगाउनुछ । देशको स्रोत शक्ति हो । सही उपयोग भएमा नै समाजको कल्याण हुन्छ । अनि देशको स्वधर्म, संस्कृति र मौलिक कलाकृतिको संवर्धन भयो भने नै देशको गौरव बढ्छ । त्यसैले यिनै मूलभूत काम कर्तव्यतर्फ अब हाम्रो पाइला अघि बढ्नुपर्छ । निषेध, फुट, बन्द र विद्रोहले हामी कमजोर हुन्छौं । परस्परको राग, द्वेष, प्रतिशोध र निषेध राजनीतिमा हुन हुँदैन । जनचाहना समेतलाई मनन गरी देशलाई केन्द्रमा राखेर कदम बढाउन विलम्ब नगरौं । संवाद, सहमति र सहकार्यका माध्यमबाट सबै पक्षको मागलाई सम्बोधन हुनेगरी संवैधानिक समाधान खोज्न दृढ संलल्पित बनौं । नेपाल शान्तिको भूमि बनोस् । उन्नतीको मुलुक बनोस् । अनि आफ्नै मौलिक सनातन र पहिचानबाट परिचालित एवं प्रतिष्ठित बनोस् । सबै नेपालीले न्याय शान्ति र सुख पाउन् । यही हाम्रो सदिक्षा हो । श्री पशुपतिनाथले सबैको कल्याण गरुन् । जय नेपाल