काठमाडौं — चिनियाँ दूतावास ले युवा अग्रणी कार्यक्रम सञ्चालन गर्ने घोषणा गर्दै इच्छुक युवाहरूबाट आवेदन आह्वान गरेको छ।
दूतावासका अनुसार कार्यक्रमको उद्देश्य नेपालका युवा पेशेवर, अभियन्ता तथा विभिन्न क्षेत्रका अग्रणीहरूलाई नेतृत्व विकास, सामाजिक रूपान्तरण र अन्तर्राष्ट्रिय अनुभवमार्फत सशक्त बनाउनु हो। यस कार्यक्रमले देशको आर्थिक तथा सामाजिक विकासमा योगदान गर्न सक्ने “गेम-चेन्जर” युवाहरूको सञ्जाल निर्माण गर्ने लक्ष्य राखेको जनाएको छ।
कार्यक्रमअन्तर्गत सहभागीहरूलाई नेतृत्व तालिम, कार्यशाला, नेटवर्किङ कार्यक्रम तथा चीन भ्रमणको अवसर प्रदान गरिनेछ। विशेषगरी चीनको विकास अभ्यासबारे प्रत्यक्ष अध्ययन गर्ने अवसरलाई कार्यक्रमको मुख्य आकर्षणका रूपमा लिइएको छ।
२२ देखि ३४ वर्ष उमेर समूहका युवा पेशेवर, राजनीति, व्यवसाय, समाजशास्त्र, संस्कृति लगायत क्षेत्रमा सक्रिय व्यक्तिहरूले आवेदन दिन सक्नेछन्। इच्छुक उम्मेदवारहरूले आवेदन फारम भरी मे १७, २०२६ भित्र इमेलमार्फत पठाउनुपर्नेछ।
दूतावासका अनुसार प्राप्त आवेदनमध्ये उत्कृष्ट १० देखि २० जना सहभागी छनोट गरिनेछन्। छनोट भएका सदस्यहरूले एक वर्षसम्म विभिन्न कार्यक्रम, परियोजना तथा गतिविधिमा सक्रिय रूपमा सहभागिता जनाउनेछन्।
यस कार्यक्रममार्फत सहभागीहरूले क्षमता विकास, अन्तर्राष्ट्रिय सञ्जाल विस्तार तथा चीन–नेपाल सम्बन्ध सुदृढीकरणमा योगदान पुर्याउने अपेक्षा गरिएको छ। साथै, कार्यक्रम सम्पन्नपछि सहभागीहरूलाई पूर्वसदस्य सञ्जालमार्फत निरन्तर अवसर र सहयोग प्रदान गरिने बताइएको छ।
